Modu berean, “frankismo garaian giza-eskubide urraketak, genozidioa eta gizateriaren aurkako krimenen erantzuleak epaitzeko Euskal Herrian dagoen aldarrikapena” kalera aterako dutela iragarri dute, “azken asteotan Bilboko manifestazioan edo Iruñeako German Rodriguezen omenaldian egin den bezala”.
Helarazitako oharrean azaltzen dutenez, kontzentrazioa burutzeko katedrala aukeratu izanak “badu bere arrazoia”. Izan ere, 1969an Gasteizko Katedral Berriaren kontsakrazioan presente egon zen Franco eta diktadoreari babesa ematen, besteak beste, diktaduraren ministroak, apezpiku ugari eta Paulo VI.aren Aita Santuaren ordezkari bezala Vaticanotik etorritako Dell’Acqua kardinala egon ziren. “Frankismoaren goraipamen ikaragarri hura gaur egun arte mantendu da, Katedral barruan zizelkatuta dagoen ezkutu frankista erraldoiak ikusgai jarraitzen duelako”, jakinarazten du plataformak. Halaber, ezkutu honek “Euskal Herriko sinbologia frankistaren Lotsaren Katedrala” bihurtzen duela gaineratzen dute.