Gasteizko Udalaren Hizkuntza Ofizialen Eskuliburua begiratu dut. Bertan ezartzen denaren arabera, euskara eta gaztelera erabili behar dira, ahoz zein idatziz, Udalak enpresaren bat kontratatzen badu, jardueraren bat diruz laguntzen badu edo horretan parte hartzen badu. Gasteizen euskara eta gaztelera arautzen dituen ordenantza egon badago, baina udal administrazioak burutzen duen jarduerari baino ez dagokio.
Egun hauetan, jakin dugu Rossi anaien Zirku Italiarra Zarautzen izan dela. Kasu honetan, Zirku Italiarrak Zarautzen emanaldiak egiteko baimena eskatu zuenean, Udalak zenbait eskakizun proposatu zizkion. Besteak beste, herrian zehar jarri beharreko publizitate paneletan euskara kontuan hartzea eta emanaldietan aurkezle euskalduna izatea. Zirku Italiarreko arduradunek bat egin dute Zarauzko Udalaren eskaerarekin.
Egia esan, ez dakit zeintzuk diren Gasteizko Udalaren eta zirkuaren arteko harremana eta kontratu- baldintzak, ezta beste hainbat herritan egiten diren era guztietako emanaldietako antolaketa-baldintzak zeintzuk diren ere. Kontua da atentzioa eman didala antolatzen diren ikuskizun askotan ez dagoela hizkuntza irizpide argirik… edo, agian, badaude baina ez dira betearazten. Noiz ikusiko ditugu administrazioak beren hizkuntza-irizpideak aplikatzen eta ikuskizun edo ekitaldi bat garatu nahi dutenei hizkuntza-baldintzak jartzen? Ikuskizun dago.