Aurreikuspenak bete egin dira eta goizaldetik aurrera elurra ari du Gasteizen. Hiriko zenbait lekutan 10 zentimetroko geruza dago eta hiritarrek arazoak izan dituzte lanera edo eskolara joateko.
Autoek traba ugari izan dituzte Gasteizko kaleetan ibiltzeko. Urbanoak atzerapen handiarekin ari dira eta Abetxukora doan tranbia geldirik dago. Udaltzaingoak ibilgailu pribatua ez hartzeko gomendioa luzatu du.
Errepideetan egoera txarra izaten ari da eta Altuben kamioientzat AP 68a itxita dago. N-1 errepidean ere arazoak daude eta mendateak itxita daude. Trenbidean ere arazoak izan dira eta Gasteiz-Iruña bidea egiten zuen tren batek Agurainen gelditu behar izan du.
Euskalmeten arabera goizeko 10.00etatik edo 11.00etatik aurrera elurraren maila igo egingo da eta Gasteizen euria egingo du.
ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.