2013ko txoroskopoa!

ARIESGARAI

Martxoak 21 – apirilak 21

.

Gorabeherak gorabehera, fruituak bilduko dituzu enplegu-kontuetan, baina ez itzazu gutxietsi lan-elkarrizketak: Jesús Hermidak erregeari egin zion elkarrizketa baino zailagoak dira denak, hori seguru! (Aholku honek zorte izugarri ona emango dizu).

TAUROGOITI

Apirilak 22 – maiatzak 21

Ez ezazu denborarik galdu 2013rako dituzun asmoen zerrenda idazten: berreskuratu ezazu 2012 edo 2011n egin zenuena, orduko asmoetako asko oraindik ez dituzulako bete :/.  Ea abenduan zerrenda hori lurperatu dezakezun... Eutsi Taurogoiti, zu baino burugogorragorik ez dago eta! (eta horrela maite zaitugu).  

GEMINIZKETA

Maiatzak 22 – ekainak 21

Lakua da gasteiztar gehien bizi den auzoa, ia 50 hizkuntz inguru hitz egiten dira gure kale eta etxeetan eta kotxe elektrikoak kargatzeko berrogei puntu ditugu hirian. Noiz irekiko diozu bihotza Gasteiz berriari? Hemendik mugitu gabe zure zerumuga handitzeko aukera izango duzu aurten. Bon voyage! 

KANTZERAUNDIARENA

Ekainak 22 – uztailak 22

Oineko hatz txikia mozten omen dute Estatu Batuetako zenbait emakumek, takoi altuekin hobeto ibili ahal izateko. Aurten, zure baitako zatitxo bat sakrifikatzeko tentazioa izango duzu, sasi-arrakastaren alde. Adi-adi egon eta izan zaitez zintzoa zure bihotzarekin: zintzotasun horrek izugarri lirainduko zaitu  2013an!  

 LEOPERURENA

Uztailak 23 – abuztuak 22

Gauza bat ziurra da: nahi edo ez, aurten ezin izango zara gaixorik jarri. Ezta okurritu ere! Gaixorik jartzearen aurkako lege proiektu bat tramitatzen ari direla diote zurrumurruek. (Kasu honetan, hobe desobedientzia egin behar ez baduzu).  

VIRGOYENA

Abuztuak 23 – irailak 23

Gogoratu: zu ez zara Rodrigo Rato, Iñaki Urdangarin edo Eduardo Zaplana. Ez duzu Telefonican lanposturik lortuko gauzak gaizki egiteagatik. Zorionez, 2013an zure talentuari zukua aterako diozu, zure bizitzaren esparru guztietan! 

 LIBRAZABAL

Irailak 23 – Urriak 22

Lehen “barra bat” eskatzen zenuen okindegian, eta orain... orain dena konplexegia da... Bada: aurten ogi mota pilo bat izango duzu aukeran. Joan zaitez pentsatzen zein nahiago duzun, zure txanda iristen denean ez duzulako zalantzatan egoteko denborarik izango... Lan auzietan rustikoa ala borobila? Maitasun kontuetan bagetea ala txapata? 2013an, aukeratzeko unea iritsiko zaizu. Prest al zaude?  

ESKORPIOKORTABARRIA

Urriak 23 – azaroak 22

Dagoeneko ez da Green Capital. Ez du, Bilbok ofizialki duen bezala, ‘munduko alkaterik onena’. Ez du La Concha-rik ezta sanferminik ere. Eta, hala ere, inoiz baino harroago egongo zara gasteiztar izateaz. Sekretua? Zuk kontatu beharko diguzu...! 

SAGITONDO

Azaroak 23 – abenduak 22

Sagit-Ondo. Zure zeinuaren izenak dena esaten du 2013a begira! Sagit-oso-ondo esan beharko genuke aurten, agian.  

KAPRIKORNITEGI

Abenduak 23 – urtarrilak 20

Albiste ona: aurten ez duzu auzitegietan salaketarik jarriko. 

Albiste txarra: ezin izango dituzu justizia tasak ordaindu.  

AKUABARRI

Urtarilak 21 – otsailak 19

'Arrapa aparrA' (irakurri orain atzetik aurrera). Hori izango da aurtengo zure palindromoa. Ez diezazula bizitzaren aparrak ihes egin! Dagoeneko ukitzen ari zara...

PISZIBURU

Otsailak 20 – Martxoak 20

(Oharra: prima de riesgo ez da lehengusin arriskutsua esaten).

Behin hori argituta: oso oso baxua izango da aurten zure arrisku saria, oso pertsona sendo eta fidagarria izango zarelako! Hori bai, kontuz zure atzetik dabiltzan espekulatzaileekin...