Behin baino gehiagotan eztabaidatu da zer den egokiagoa, azpitituluak erabiltzea ala bikoizten jarraitzea (besteak beste, abenduan Nolanahi ere, ez dugu sarritan izaten film euskaratuak ikusteko aukera (are gutxiago zineman); beraz, merezi du dauzkagun aukera bakanak aprobetxatzea. Oraingoan, Hasta la Vista komedia gazi-gozoa euskaratu dute REC estudioetan, eta urtarrilean iritsiko omen da Euskal Herriko zinema-aretoetara.
Intouchables (2011) pelikula frantziar arrakastatsuaren eta Little Miss Sunshine (2006) lan estatubatuarraren nahasketa bitxi honek sari ugari lortu ditu mundu osoko hainbat zinemalditan; ikusleak hunkitu ditu, batik bat. Ardoa eta emakumeak oso gustuko dituzten hiru gazte minusbaliaturen istorioa kontatzen du. Lehenengoa nahi adina dastatu dute, baina ez dute sekula izan emakume batekin “zentzu biblikoan” egoteko aukera. Espainiako hegoaldean minusbaliatuentzako burdel bikain bat dagoela entzuten dutenean, birjintasuna galtzeko bidaia “enologiko” bat egitea erabakitzen dute. Gurasoek ez dute uste oso ideia ona denik, hiru mutilek bakarrik joan nahi dute-eta, baina gazteak tematuta daude, eta kosta ahala kosta iritsiko dira beren jomugara.
Flandeseraz eta frantsesez grabatu den pelikula hau oso komedia atsegina da. Ea egia den eta laster iristen den Euskal Herriko aretoetara!
FITXA TEKNIKOA
JATORRIZKO IZENBURUA: Hasta la Vista
URTEA: 2011
IRAUPENA: 109 min.
HERRIALDEA: Belgika
ZUZENDARIA: Geoffrey Enthoven
AKTOREAK: Robrecht Vanden Thoren, Gilles De Schrijver, Tom Audenaert, Isabelle de Hertogh
GIDOIA: Pierre De Clercq
GENEROA: Komedia. Drama.
Egilea: Regi Larrucea