Gabonak, gustuko dituen horietakoa al zara?
Bai, betidanik gustatu zaizkit. Giro polita sortzen da etxean eta urtero gustura hartzen ditugu egun hauek. Herri ohiturez gozatzea gustuko dut: Olentzero gaua eta ekarritako opariak biharamunean irekitzea, Santo Tomas eguna, Gabon gaueko ardo beroa, etxean bertako produktuez mimoz prestatutako platerak dastatzea, Arabar Errioxako ardo ondua, Arabako txakolina, San Silvestre lasterketa...
Zein izango litzateke zure plan ideala egun hauetan?
Egiten dudanarekin pozik nago, nire jendeaz eta jendearekin gozatzea.
...eta egin ohi duzuna?
Hori bera. Eta bereziki, nire bi iloba maitagarriekin “pila, pila... patata tortilla”, kar-kar, jolastu eta ongi pasatu...ohi bezala.
Gabonetan jaso duzun oparirik bereziena…
Opariak bainoago, opariak irekitzeko unea da berezia... Olentzerori bezperan ardoa eta galletak, bizkotxoa edo turroia uzten dizkiogu, baita astoari azenarioa ere, eta hurrengo egunean janda eta edanda dagoela ikusten dugunean, hori unea!, ja-ja...bere oin-aztarnak ere uzten ditu...baina ez dugu inoiz harrapatzen...ea aurten!!
…eta egin duzun bereziena…
Gabon zaharra eta urte berria hondartza batean eta giro beroan ospatzea agian...edota berezi ez baina bai gogoko, urte zaharra nahiz berria korrika egiten agurtu.
Zer eskatuko diozu urte berriari?
Zoriontasuna eta osasuna nire inguruko guztientzat eta bakea, normalizazio politikoa eta justizia soziala gure herriarentzat...bide horretan, krisialdia gainditzeko oinarriak ezartzea, euskal presoak etxeratzea, bizikidetza sendotzea eta independentziari buruzko galdeketarako urrats sendoak ematea.