GEU: 20 URTEKO JARDUNA
Magisteritzan luzea izan zen
gure bileren bilduma.
Eztabaidetan hau eta beste,
a zer nolako jarduna!
Bazkideen beharra,
gure sortze batzarra,
logotipo bat kuttuna.
Ez lanik gabe mundura erditu
zen GEU (Gasteiz Euskalduna).
Mintzatua izan behar euskara,
baita ere leitua.
Aldizkaria sortzeko ere
bazen jende bat prestua.
Lotu gintuen haria
zen GEU aldizkaria,
penaz noizbait bukatua.
Orain Hirinet izango ahal da
behar dugun topalekua!
Indartu behar zen euskarazko
egitarau kulturala:
hitzaldi, bertso, kantaldi eta
hamaikatxo gauza hala.
Urteak jira-bira,
hor izan du segida,
eta, lehen ez bezala,
hilabetean behin gurea da
Alde Zaharreko Parrala.
Gustura goaz beti euskaldunok
gure ama den izadira,
Elkartzen gaitu mendiak eta
nola ez jarri hara begira?
Hainbat bide urratuz,
hamaika euskaldun batuz
Toloñotik Aizkorrira,
ze aspaldian esan genuen:
Zatoz GEUrekin Mendira!
Pin txiki batez joan izan gara
dendarien ingurura.
“Zuk nahi baduzu euskaraz” dugu
lotu gaitzakeen aingura.
Nola jardun gehiago,
eraginez oparo?
Orain dator akordura,
Ia hamar urtez arrakastatsu
den Irakurleen Kluba.
Gazte batzuek berritu dute
elkartearen jarduna,
hizki larritan jar genezake
Ainhoak erein ziguna.
Kalakan buruz buru,
seiehun lagun inguru,
ekintza arrakastaduna,
Aspaldi honetan indartsu dabil
Gasteizko Mintzalaguna.
Hogei urtetan bilduak gara
hainbat jende elkarrengana,
baina oraindik ez da ederra
euskaldunon panorama.
Zer dugu euskalgintza
indartzearen giltza?
Gozamena eta afana.
Odol berria ez da soberan,
handia delako lana.
Xabier Rico (Kakiturriko bertso koadrilaren laguntzaz)
Gasteiz, 2012ko azaroaren 24a