Ez dugu sarritan izaten zinemetan pelikulak euskaraz ikusteko aukera, eta are gutxiagotan ikusten ditugu Euskal Herrian eta euskaraz grabatutako filmak zinemetan. Baina urriaren 11n ezohiko aukera horietako batez gozatzeko aukera izango dugu; izan ere, Bypass pelikula Euskal Herriko aretoetan estreinatuko da.
Albiste bikaina da komedia hau joan zen astean Donostiako Zinemaldian ikusteko aukera izan ez genuenontzat. Patxo Telleria aktore, umorista eta gidoilari ezagunaren lan honek Gorka Otxoa (Goenkale, Vaya Semanita, Pagafantas) eta Barbara Goenaga (Goenkale, Izarren Argia) ditu protagonista, eta zinema-aretoa barre-algaraz bete omen zuen Zinemaldian.
LABURPENA: Xabi (Gorka Otxoa) Bartzelonan bizi da neskalagunarekin (Barbara Goenaga). Egun batean, Maria (Sara Cózar), bere adiskide bat, hilzorian dagoela eta berarekin maiteminduta dagoela esaten diote. Orduan, Xabik erabakitzen du Mariari maite duela esatea, bere lagunaren azken egunak gozoagoak izan daitezen. Baina kontua da ezusteko albiste horri esker Mariak ustekabean sendatzea lortzen duela eta Xabirekin harreman formala izan nahi duela. Medikuek Xabiri esan diote edozein albiste txar hilgarria izan daitekeela Mariarentzat, eta, orduan, harekin maiteminduta dagoen itxurak egiten jarraitzea erabakitzen du.
FITXA TEKNIKOA
Izenburua: Bypass
Urtea: 2012
Iraupena: 98 min
Zuzendariak: Aitor Mazo, Patxo Telleria
Gidoia: Patxo Telleria
Aktoreak: Gorka Otxoa, Barbara Goenaga, Sara Cózar, Mikel Losada, Itziar Atienza, Aitor Mazo, Unax Ugalde
Generoa: Komedia / Komedia erromantikoa
TRAILERRA
Regi Larrucea