Oraingoan, grebarako zioa Uztailaren 13ko 20/2012 Legean aurki dezakegu: BEZaren igoera, langabetuen ordainketan eta dependentziarako laguntzetan murrizketa… enpresentzako kotizazioak jaisten diren bitartean! Gainera langile funtzionarioentzat gabonetako ordainsaria desagertzen da (urteko soldataren %6-%8 inguru), besteak beste.
Argi dago langileen aurkako neurriak etengabe ari direla hartzen, era batean enplegatu publikoentzat, beste era batean enpresa pribatuetako langileentzat. Baina hori bai, beti behekoen kontra, nahiz krisia ez duten beraiek eragin. Normala da giro soziala gatazkatsua izatea eta greba deialdiak egotea; izan ere, anormala litzateke kontrakoa, hau da, jendeak eskubideak galtzea eta pobretzea inolako protestarik gabe.
Euskal Herrian erantzun esanguratsua gauzatzen ari da bai gizarte eragileetatik, bai gehiengo zabala duten bertoko sindikatuetatik. Irailaren 26ko deialdia ELA, LAB, ESK, STEE-EILAS, EHNE, HIRU, LKN-CGT, eta CNT sindikatuek sinatzen dute, eragile sozial ugarirekin batera.
Urte hauetan ezin da ez ikusiarena egin, gauza asko gertatzen ari baitira oso denbora gutxian, eta aldaketak, gainera, ez dira nolanahikoak. Gizarte eredu aldaketa honetan, ez duzu zer esanik? 26an zure hitza, beste lagun askorekin batera, gehitu dezakezu ezetz esateko. Ez duzu aukera aprobetxatuko?.