Iraila, udaren buztana eta neguaren hastapena

hirinet 2012ko ira. 4a, 09:19

	ARIESGARAI Martxoak 21 – apirilak 21 Iluntzeari argazki bat aterako diozu, baina ezin izango duzu istant horren isiltasuna fotografiatu. Jatetxe batean zaudela tuiteatuko duzu agian, baina ezin izango duzu zapore limurtzaile hori Twitterren eskegi. Kontzertua bideoz grabatuko duzu, baina ezin izango duzu momentuko dar-dar hunkigarria hori gorde. Eta ez du inporta.
	TAUROGOITI Apirilak 22 – maiatzak 21 Ikasturte berri osoko hilabete guztietako aste guztietako egun guztietako ordu guztietarako planak egin ditzakezu. Baina ziur egon: ikasturte berri osoko hilabete guztietako aste guztietako egun giztetako ordu guztiek dituzte planak zuretzat. Utziozu zure bizitzaren norabidea hainbeste gidatzeari, eta utz ezazu bizitzak zure norabidea markatu dezan.
g	GEMINIZKETA Maiatzak 22 – ekainak 21 Larogeitapiku urteko emakume errukitsu horrek zaharberritu izan ez balu... nork ezagutuko zuen orain Borja herriko Ecce Homo-a? Ikasturte berri honetan, ausartu zaitez zure bizitzaren berriztapen bat egiten. Bidean zerbait galdu dezakezu... baina trukean beste asko irabazi!
	KANTZERAUNDIARENA Ekainak 22 – uztailak 22 Ezin dizute Balio Erantsiaren Gaineko Zerga (BEZ-a) ezarri ematen dituzun musuetan, lasaitzen zaituzten loaldietan, egiten dituzun aldarrietan, berotzen zaituzten bihozkadetan, amesten dituzun zoramenetan. Zergatik ez horiek guztiak ehuneko 18tik 21era areagotu? Edo gehiago. Zure gustura.
	LEOPERURENA Uztailak 23 – abuztuak 22 Gorriz markatutako egunak, asteburuak, zubiak eta pintxopoteak atsegin dituzu gehienbat egutegian. Imajinatzen al duzu astelehena iristeko irrikatan egotea? Eta astearte eta asteazkenak sutsuki maiteko bazenitu? Gutxi dira gorriz markatutako egunak bizitzan.
	VIRGOYENA Abuztuak 23 – irailak 23 Sandaliak ala botak? Jaka bakeroa ala forro polarra? Praka finak ala panazkoak? Irailean zein arropa jantzi erabakitzea bezalakoa izango da zure ikasturte hasiera: ezbaian ibiliko zara, zalantzatan, eta alde batean zein bestean aurkituko dituzu zoriontasun zipriztinak.
	LIBRAZABAL Irailak 23 – Urriak 22 Arraindegian emango dizuten perrexila. San Anton egunean oparituko dizuten txokolate beroa. Santa Agedan eskainiko dizkizuten tragoak. Gasolindegian banatuko dizkizuten opari-bonoak... Ikasturte honetan ez diozu ezeri muzin egingo. Nork egingo du barre orain Zeledon bezperan Virgen Blanca-ko lore bat dohainik lortzeko ilara luzeak egiten zituzten aitona-amonez? Eh?! ;) Kalean banatuko dizuten propaganda ere pozik hartuko duzu!
	ESKORPIOKORTABARRIA Urriak 23 – azaroak 22 Nektarinaren hezurrekin, lepokoak. Yogurt-ontziekin, marakak. Etxeko hauts-bolekin, pelutxeak. Egunkari zaharrekin, bokatak biltzeko papera (komuneko papera egiteko, hobe propaganda orriak; leunagoak dira). Berrerabilpena: hori izan daiteke zure hitz magikoa udazken honetatik aurrera.
	SAGITONDO Azaroak 23 – abenduak 22 Egia baldin bada ikasturte honetan kirola egin nahi duzula... irailaren 10ean Olarizu tontorra igoz (eta jaitsiz) has zaitezke! (Txoroskopoa irailaren 10a baino beranduago irakurtzen baduzu, erreklamazioak txoroskopoa@txoroskopoa.txoro postara bidali).
	KAPRIKORNITEGI Abenduak 23 – urtarrilak 20 Usain berria duten koadernoak, guztiz zorroztuta eta koloreka ordenatuta dauden margoak, oraindik zimurdurarik ez duen liburu-estalkia, birrindu gabeko klarionak, azken txorizo bokataren ogi-apurrak ez dituen motxila... Eskolara Bueltak nostalgia punttu bat pizten al dizu? Gozatu zure labueltalkole ospakizun-sekretua!
	AKUABARRI Urtarilak 21 – otsailak 19 Bazkide kuota ordaindu, kontzertu eta hitzaldietara joan, bileretan parte hartu, www.hirinet.net Facebook eta Tuenti eta Twitter eta beste edozein sare sozialen bidez zabaldu, webguneko Sarrera Ontzira zure ekarpenak bidali... ikasturte honetan dena eman nahi izango duzu GEU elkartearen eta euskararen alde! Laaaaaasai! Dena ezin da egin, baina zure harri koskorra harkaitz bihurtuko da ziur.
	PISZIBURU Otsailak 20 – Martxoak 20 Urriaren 28an (29an, beranduenez), ordu bat atzeratuko duzu erlojua (03.00etan, 02.00ak izango dira). Nork esango du gero Txoroskopo honek ez dizula etorkizuna asmatzen?!