Zabalgana auzoko Euskara Batzordeak auzoko haur eskola eta eskoletan lan egiten duten L1 udal langileen lanpostu guztiak hizkuntza eskakizuna izan dezaten eskatu dio udalari.
Batzordeak azaldu duen moduan, lanpostu hauetan lan egiten duten pertsonek harreman zuzena izaten dute umeekin eta familiekin. Antza denez, hurrengo hilabeteetan lanpostu hauen mugikortasun lehiaketa izango da, eta lanpostu hauek betetzen dituzten pertsonak alda daitezke. “Lehiaketa honek gure auzoan ez du bermatuko langilearen euskararen ezagutza hurrengo bi urtetan”, azaldu dute.
“Euskaraz bizi eta hitz egiteko eskubidea” aldarrikatzen du auzoko Euskara Batzordeak eta eskolako hizkuntza eredua errespetatzea eskatu du. Horrela, Udalari langileak euskalduntzeko bidea jar dezala eskatu dio, “zerbitzu guztiak ofizialak diren bi hizkuntzatan berma daitezen”.
Izan ere, Zabalganan familia asko dira euskara ezagutu eta erabiltzen direnak eta horregatik, “euskaraz bizitzeko hautuari udalak erraztasunak jarri beharko lizkioke, eta egoera honek ez du gure hizkuntza eskubidea bermatzen”, zehaztu du.
Eskakizun honek auzoan eremu ezberdinetan lanean diharduten kolektiboen babesa jaso du, hala nola, Zabalgana Batuz Auzo Elkartea, Mariturri haur eskolako hezitzaile taldea, Zabalgana eskolako klaustroa, Galtzagorri haur eskolako hezitzaile taldea edo Zabalgain Kultur ekimena.