Trespondeko bizilagunak lasaitu egin dira. Ovo 12 kooperatibak udalerrian eraiki nahi zuen 40.000 oiloentzako etxaldearen espedientea itxi eta artxibatu du Iruña Okako Udalak azkenean, enpresak ez duelako ezinbestekoa den dokumentazioa epean aurkeztu, eta horrenbestez espedientea bertan behera utzi dute.
Ovo 12 kooperatibak Tresponden zabaldu nahi zuen instalazio intentsiboaren kontrako plataforma bat osatu zuten herriko bizilagunek proiektuaren berri izan bezain pronto, eta horrelako etxalde batek herritarren osasunean eta ingurumenean izan zitzakeen kalteez ohartarazi zuten. Hurrengo apirilaren 10ean, mobilizazioa eta kontzertua antolatu zituzten makro-etxaldearen kontra, eta gainera, azken asteetan, udal talde politiko guztiekin bilerak egin dituzte haien iritzia eta jarrera azaltzeko.