Arabako Diputazioak eta Espainiako trenbide sareaz arduratzen den ADIF erakundeak Manzanosko eta Pobesko trenbide pasaguneak kentzeko hitzarmena sinatuko dute "datozen asteetan", aldundiak zabaldutako ohar baten arabera.
Foru errepide sarean geratzen diren azken pasaguneak kentzeko proiektuak datorren urtean idatziko dituzte. Proiektuak idazteko 400.000 euro beharko dituztela kalkulatu dute bi erakundeek, eta inbertsio horri erdibana aurre egingo diote. Horiek gauzatzeko beharrezkoak izango diren lanen kostua ere erdi bana ordainduko dutela iragarri dute.
Hurrenez hurren, Manzanosko eta Pobesko A-4342 eta A-2622 errepideetan daude pasaguneok. ADIFekin "hainbat hilabetez negoziatzen aritu ondoren", gaurko Foru Gobernu Kontseiluan eman diote argi berdea hitzarmenaren testuari. Diputazioak nabarmendu du segurtasuna hobetuko dela horrela, eta baita udalerrien barne kohesioa ere.