Duela urtebete Zanbranako ehiza barrutian norbaitek miru gorri bat akabatu zuelako salaketa jarri zuten Diputazioak eta Eguzki talde ekologistak. Salaketa hori, ordea, behin-behinean artxibatu du Fiskaltzak, tiro egin zuen laguna ezin izan dutela identifikatu argudiatuta.
Espezie hori —Milvus milvus— legez babestuta dago Euskadiko Autonomia Erkidegoan, galzorian dagoelako. Hortaz, espezie horretako hegazti nahita hiltzeak espetxe zigorra izan dezake.
Fiskaltzaren idazkiaren arabera, soberan frogatuta dago hegaztia nahita hil zutela, eta tiroa egin zuena Zanbranako ehiza barrutik bertatik egin zuela.
Eguzkiren ustez, "funtsezkoa" da bistaratzea horrelako kasuak ez direla "kasu bakanak edo isolatuak". Ekologisten esanetan, espero izatekoa zen salaketaren artxibatzea, "oso zaila" delako identifikatzea tiroa egin zuena. "Baina salaketen bidez bistaratu nahi dugu hemen ingurumenaren aurkako delituak egiten ari direla", erantsi dute, ohar batean. Are gehiago, ekologistek ohartarazi dute argitara ateratzen diren kasuak "icebergaren tontorra" baino ez direla