Uraren Euskal Agentzia publikoak Armiñongo ibai-pasealekua berritzeko obren lehen fasea gauzatu du, ibaiaren eta hiri-bilbearen artean naturalizatutako ibaiertzeko landaredi-zerrenda bat berreskuratuz. Pasealekua osatzen duen hormigoizko zolataren zati bat kendu eta tarte horretan ibaiertzeko espezie autoktonoak landatu dituzte.
Armiñongo Udalak eta URAk sinatutako lankidetza-protokoloaren babesean egin da jarduketa, 27.000 euro inguruko aurrekontuarekin. Gainera, Eskualde Garapenerako Europako Funtsaren finantzaketa jaso du.
300 metro inguruko tartearen lehen 100 metroetan egin da oraingo esku-hartzea. Gainerako zatia 2022an egingo da, ibai artifizial naturalizatu bat sortzeko lanekin batera, Armiñongo errota zaharrera ura bideratzeko presaren ondoan, Zadorrako arrain faunaren joan-etorria errazteko helburuarekin. Izan ere, ibai artifiziala sortzeak kalitate oneko lur-soberakinak sortuko ditu, eta ibaiertzeko gainerako 200 metroak naturalizatzeko eta landareztatzeko erabiliko dira.
Orain, oso eraldatuta daude Zadorra ibaiaren ezkerreko ertz eta ibaiertza, Armiñongo hirigunetik igarotzean: ibaiertzean zehar harri-lubeta bat dago eta ibaiertzak okupatzen du hirigintzaren garatzeak. Ondorioz, Zadorra ibaiaren zati horrek ez du ibaiertzeko landaredirik, ezta ibai-ekosistemari ematen dizkion zerbitzu ugaririk ere, besteak beste: ibilguaren itzala, fauna espezieentzako babeslekua, elikagai iturria eta paisaia balioa.