Ehun autorentzako aparkaleku bat egokitu zuen Zanbranako Udalak Bergantzu inguruan, 2018. urtean, Jugalez ibaiaren ibilbidea inauguratu zenean, baina iazko udan eta Aste Santuan gainezka egin du parkinak, eta autoak herriko kale estuetan bertan, errepide bazterrean eta nekazarien lurzoruetan ere agertu dira. Egoerak bizilagunen haserrea eta Udalaren kezka eragin ditu, eta neurriak hartu behar izan dituzte.
Hartara, bisitariei harrera egiteko aparkaleku berri bat eraikitzeko lurzatia erosi du Udalak, eta urte osoan erabiltzeko egokia den aparkaleku bat sortzen ari da bertan. Aparkalekua erabiltzeko, aldez aurretik erreserba egin beharko da eta tasa bat ordaindu.
Gainera, Udalak Bergantzuko etxe bakoitzean, baita herriko tabernetan ere, aparkatzeko hiru txartel banatuko ditu, eta debekatuko du herrigunean aparkatzea txartel hori izan gabe. Udalak iragarri du aparkatzeko txartelak ez direla nominalak izanen, eta horrenbestez etxe edo taberna bakoitzak erabakiko du nori banatu.