Uztailean, laugarren urtez jarraian, Schubertaldia Gaubeara itzuliko da, musika klasikoaren jaialdiaren sendotasuna eta bizitasuna erakusten duen programa batekin, eta Euskal Herrian entzuteko aukera izango den kontzertu kopurua handituta, lau izatetik sei izatera igaro baitira.
Jaialdia uztailaren 10ean hasiko da, oso kontzertu bereziarekin. Johann Sebastian Bachen Goldberg Bariazioak entzun ahal izango dira Angostoko elizan, Lina Tur Bonet biolinistaren eta Varvara pianistaren bertsioak protagonista izango dituen emanaldian.
Uztailaren 16 eta 17ko asteburuan, berriz, kantu poetikoko bi errezitaldi izango dira Tuestako elizan: Marie Seidler mezzosopranoa eta Sheva Tehoval sopranoa, Daniel Heide pianistarekin batera.
Uztailaren 23an, Bachicaboko tenpluan, Carlos Mena kontratenor gasteiztarrak joko du Daniel Zapicorekin; eta uztailaren 24an, Tuestan, Christian Blackshaw britainiarrak debuta egingo du Espainiako estatuan Schuberten Impromptus eta Schumannen Fantasiarekin. Jaialdia uztailaren 30ean itxiko du Gerhard laukoteak, Bachicabon, Debussy eta Schuberten lanekin. Hala, Espainiako estatuko hari laukote onenak Gaubeara eramateko apustuari eusten dio jaialdiak.
Aurtengo edizioak 30 kontzertu izango ditu, eta 58 musikarik hartuko dute parte. Vilabertran (Katalunia) izango da, beti bezala, jaialdiaren gune nagusia, baina Bartzelonan, Castello d'Empuriesen eta Vilajuigan ere izango dira kontzertuak; Gaubeako Schubertaldiaz gain, Cadaqueseko elizan kontzertu bat izango da, eta beste bat Mondoñedoko katedralean (Lugo, Galizia).