Langraiz Oka eta Gasteiz lotzen zituen 7:37ko trena behin betiko kenduko duela jakinarazi du Renfek. Hartara, langraiztarrek goizeko lehen orduan Arabako hiriburura garraio publikoan joateko duten aukera bakarra da Arabako Foru Aldundiaren autobusa. Zerbitzu hori 6:55ean eta 7:09an ateratzen da Langraiz Okatik; eta 7:22an eta 7:24an iristen da Gasteizera, hurrenez hurren.
Dena den, tokia aldez aurretik ziurtatzeko ezinbestekoa da txartela aldez aurretik eskuratzea www.araba.eus/alavabus webgunearen bidez. Hala ere, udalerriko bizilagunik ordutegi horietan plazarik gabe gera ez dadin, Langraiz Okako Udalak erabaki du bederatzi plazako udal taxia jartzea erabiltzaile guztien eskura, doan. Taxi hori 07:09an aterako da, udaletxearen aurreko autobus-geltokitik, Aldundiaren autobusetan lekurik gabe geratzen diren erabiltzaileak eramateko.
Gainera, Udala gestioak egiten ari da Renferekin, kendu den goizeko trena berreskuratzeko eta Langraiz Oka eta Gasteiz lotzen dituen trenen joan-etorria hobetzeko, herritarrentzat "funtsezkoa" dela uste baitu.