Genero indarkeria

Zanbranako alkatea indarkeria matxistagatik salatu dute

Zanbranako alkate Aitor Abezia ekitaldi publiko batean. / herrismartik.eus

Bikotekide ohiak Aitor Abezia Zanbranako alkatea salatu du, ustezko eraso fisiko batengatik.

Zanbrana 400 biztanle inguruko Añanako herria da, eta Aitor Abezia udalerriko alkatea da 2007tik, hautagaitza independente baten parte. Ospe publikoa lortu zuen De Miguel auzitik eratorritako Zanbranako adarra salatzeagatik.

Gasteizko 1 zenbakiko Instrukzio Epaitegian deklaratu du dagoeneko, eta genero indarkeriarekin lotutako gaiez arduratzen den epaileari igorri diote kasua.

Igandean eldiarionorte.es atariak argitaratu zuenez, salaketa erregistratu ostean, kasua Gasteizko epaitegira eraman dutela ziurtatu dute Segurtasun Saileko iturriek. Iturri horiek ez dute alkateari egozten zaizkion gertakarien inguruko datu gehiagorik eman, ezta salaketa nork jarri duen ere.

Hala ere, egunkari digitalak argitaratutakoaren arabera, bikoteak partekatzen duen adingabe baten zaintzan dago gatazkaren jatorria. Ustez erasoa gertatu zen egun berean, Abeziak salaketa aurkeztu zuen adingabea entregatzeko akordioa ez betetzeagatik. Ordu batzuk geroago bildu zirenean eman zen ustezko erasoa.

Salatzaileak lesioen parte bat eman du, eta Abeziaren inguruko iturriek adierazi dute ez dagoela inolako erasoren "ebidentzia fisikorik"; lekukoen arabera, "dena testuingurutik kanpo" dago.

Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide