Genero indarkeria

Gabon Zaharrean hiru emakumek jasandako eraso matxistak salatu ditu Iruña Okako Udalak

Elkarretaratzea egin dute bizilagunek, arratsaldean, erasoak salatzeko. PHOT.OK

Udalak antolatutako kotilioian hiru emakume erasotu zituzten; erasotzailea espetxe-funtzionarioa den argitzeko eskatu du udalbatzak.

Iruña Okako udalbatzak elkarretaratze isila deitu du gaur, udaletxearen aurrean, 18:00etan, eta herritarrak animatu ditu mobilizazio horretan parte hartzera. Goizean, adierazpen instituzionala onartu dute udal talde politiko guztiek, aho batez, Gabon Zaharrean Udalak berak antolatu zuen kotilioian hiru emakumek jasan zituzten eraso matxistak salatzeko: "Horrelako eraso sexistak gure gizartearen esparru guztietan gertatzen den egiturazko indarkeria matxistaren beste isla bat dira. Emakumeen aurka erabiltzen den indarkeria emakumeen duintasunaren, osotasun fisikoaren eta moralaren aurkako eraso larria da, emakumeen giza eskubideen urraketa larria hain zuzen".

Eraso matxistaren biktimei babesa adierazteaz gainera, Udalak erabaki du Iruña Okako hiru bizilagunak "zaintzeko eta defendatzeko" akusazio partikular gisa azalduko dela prozedura judizialean. Era berean, dagokion administrazioari eskatu dio "erasotzailea edo erasotzaileak espetxe-funtzionarioen kidegokoak direla baieztatzen bada, dagozkion erantzukizunak argitu daitezela". Halaber, Udalak adierazi du ez dutela erasotzailea udalerrian nahi, eta eskatu du "beste udalerri batera lekualdatzeko".

Udalak herritarrei eskatu die inolako eraso sexistaren konplize ez izateko eta indarkeria matxistaren edozein adierazpenen aurrean jarrera aktiboa izateko. "Gogoratu guztion ardura dela, gure eragin-esparruetatik, indarkeria desagerrarazteko borroka egitea, denoi eragiten digun gizarte-arazoa baita".

 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide