Sei karabana guztiz kiskali dira eta hainbat bungalow kaltetu ditu, astelehenean goizean, El roble verde kanpinean gertatutako suteak. Ordu horretan bertan zeuden hogeita hamar bat lagun ere aterarazi behar izan zituzten suhiltzaileek, baina ez da inor kalteturik gertatu.
Nuvillako herritar batek ohartarazi zuen, goizeko lehenengo orduan, sua zegoela inguruan, eta Espejoko suhiltzaileak berehala iritsi ziren Pobesetik lau kilometrora dagoen kanpinera. Ordu bete behar izan zuten suhiltzaileek sua itzaltzeko eta ingurua bermatzeko; izan ere, hainbat butano-botila eztanda egin zuten sutean, eta sugarrak propano-biltegira iristeko arriskua zegoen.
Nuvillako El roble verde kanpina orain dela hamar bat urte zabaldu zuten, eta batik bat karabanak eta bungalowak urte osoan erabiltzen dituzten familiak jasotzen ditu. Hain zuzen bisitari finkoen zonaldea da suak kaltetu duen espazioa.
Lehen hipotesien arabera, karabana batean sortu zen sua.