Ezohiko udalbatza deitu dute asteartean Gaubean, azken hamabost egunetan udalerriko biztanleak jasaten ari diren etengabeko argi mozketak eta tentsio-jaitsierak salatzeko. Arazo larriena urriaren 14an gertatu zen; egun horretan udalerria osatzen duten 28 herrietatik erdiak eta La Dehesa industrialdeko enpresak argirik gabe geratu ziren zortzi orduz. Gainera, asteburu honetan, Gaubeako herri gehienetan etengabeko argi mozketak eta tentsio-jaitsierak pairatu dituzte, gauez zein egunez.
Juan Carlos Ramirez Escudero alkateak salatu du Iberdrolak ez duela inolako azalpenik eman orain arte. Biharko ezohiko udalbatzan aurkeztuko duten mozioan energia enpresari exijituko diote arazoak berehala konpontzeko eta kaltetuen erreklamazioak erantzuteko.