Arabako Foru Aldundiak iragarri du 2019ko lehenengo hiruhilekoan irekiko dutela Berantevillako saihesbide berria; era horretan, N-124 errepidearen Arabako zatiko bi bidegurutze arriskutsuenak desagertuko dira: errepide hori Berantevilla herriarekin eta Lacorzanilla industrialdearekin lotzen duen bidegurutzea, eta errepide horretatik AP-68 autobidera eta Miranda de Ebrora iristeko sarbidea. 20 milioi euroko inbertsioa du obrak.
N-124 errepidea hobetzeko eta Berantevillako saihesbidea egiteko lanak 2017ko udaberrian hasi ziren, eta dagoeneko amaitu dute lurrak mugitzen eta zapaltzen, Ihuda ibaiaren gaineko zubiak egiten, N-124 errepidetik AP-68ra eta Berantevillara sartzeko mailen arteko lotura egingo duen egitura eraikitzen, eta saihesbideak herrian izango dituen goiko eta beheko pasabideak egiten. Horrez gain, asfaltatu berri dute N-124 errepidetik Lacorzanilla industrialdera sartzeko bide berria.