Kamioilari bat larri zauritu da gaur goizean, Erriberagoitian, AP-68 errepidean Bilboko noranzkoan, kamioia iraulita. Gai arriskutsuak zeraman kamioia, Eusko Jaurlaritzako Segurtasun Sailak jakitera eman duenez.
10:00ak aldera jazo da lan istripua, oraindik argitzeke dauden arrazoiak tarteko, erretxina zeraman kamioia bidetik irten eta irauli egin denean. Arabako Foru Suhiltzaileak istripuaren lekura hurbildu dira, eta zauritutako garraiolaria artatu ondoren isuria geldiarazten saiatu dira. Kamioilaria larri zauritu da, eta Gasteizko Santiago ospitalera eraman dute.