Gatzagen historia berreskuratuz, soinu eta argi ikuskizuna eskainiko dute bihar Gesaltza-Añanako Gatz Haranean herritarrek. Urtero antolatzen duten Gatz Azokaren barruan egingo dute antzezpena. Gatz produkzioak hondoa jo zuenean, Añanatik alde egin behar izan zuen gazkin baten bizitza kontatzen du ikuskizunak; Gatz Harana berreskuratzen ari dela jakiten duenean, herrira itzuliko da gazkina, haurtzaroko oroitzapenak eta paisaiak gogoratzeko. Ikuskizuna 22:30ean hasiko da eta ordu eta erdi iraungo du. Sarrerak salgai daude dagoeneko 15 euroan. Jesarlekurik okupatuko ez duten hiru urteko edo gutxiagoko haurrak dohainik sartu ahal izango dira.
Leku-kopurua mugatua da eta sarrerak agortu egiten dira, beraz, sarrera aldez aurretik erostea gomendatzen dute, webgunean (www.vallesalado.com), Gatz Haraneko Bisitarien Gunean, edo Gasteizko Turismo Bulegoan. Sarrerak jasotzeko ordutegia hauxe da: 9:45etik 14:30era eta 15:45etik 19:30era Gatz Haraneko Bisitarien Gunean.
Ikuskizun nagusiaz gainera, 17:00etatik aurrera, artisauen azoka izango da, eta bitartean herrian bisitaldi antzeztuak eskainiko dira. Halaber, Gesaltza fanfarreak giroa alaituko du, eta kirolak maite dituztenentzat gazkin-boloaren modalitatean bola-joko txapelketa egingo dute, 19:00etan bola-tokian. Gainera, 20:00etan barbakoa egingo dute.
Asteburu osoan, Añanako Gatz Haranak bisita gidatuen eskaintza areagotuko du, eskariari aurre egiteko.