Arabako Aldundiak, Eusko Jaurlaritzako Ingurumen sailak, Lantarongo Udalak, Añanako Kuadrillak eta Vital Fundazioak hitzarmen bat sinatu berri dute, datozen lau urteetan Sobrongo Ur Museoa zabalik egonen dela bermatzeko. Zehazki, datozen urteetan, guztira, 322.500 euroko ekarpena egingo dute erakundeek.
XIX. eta XX. mendeen artean zabalik izan zen bainuetxe handi baten inguruan dago gaur Sobrongo Ur Museoa, Ebro ibaiaren ertzean. Bere garaian, ur minero-medizinalei esker, ospe handia izan zuen zonaldeak, baina urte luzeak dira erabat bazterturik dagoela. Hala ere, azken urte hauetan, turismoarekin eta abenturarekin lotutako jarduerei esker biziberritu da; orain dela hilabete gutxi, esate baterako, Sobrongo ferrata-bidea inauguratu zuten, Euskal Autonomia Erkidegoan dagoen halako egitura bakarra.
Ur Museoa ere azpiegitura aitzindaria da EAEn, uraren inguruko ezagutza jorratzen duen bakarra baita. Museoak ohiko baliabideak eskaintzen ditu uraren ezagupena hurbiltzeko (maketak, diaporamak, proiekzio birtualak), baina era berean puntako teknologia berriak erabiltzen ditu. Gainera, epe laburrera lantegiak eta jarduera didaktikoak eta ludikoak abian jarri nahi dituzte, herritarrei ekosistemaren balioak hurbiltzeko. Halaber, Uraren Euskal Agentziaren bitartez, ingurumen proiektu bat bultzatuko dute, museoa ingurumen hezkuntzako zentroen euskal sarean sartzeko, eta era horretan Arabako lehenengo 'ekoetxea' izateko.
Inaugurazio ekitaldian izan ziren Sobrongo Batzar Administratiboko lehendakaria, Lantarongo alkatea, Añanako Kuadrillako lehendakaria, Arabako Ahaldun Nagusi Ramiro Gonzalez, eta Jaurlaritzako Ingurumen sailburu eta Uraren lehendakari Iñaki Arriola.
Museoa zabalik izango da asteburuetan.
