Geoloeguna 2016 izeneko ekimenaren baitan antolatu dute Valderejo eta Obarenes Mendiak parkeen arteko haranean txangoa. Oscar Escribano geologoak gidatuko duen bisita dohainik da eta jende guztiari irekita dago. Parte-hartzaileek ingurua "begi geologikoekin" ikusteko aukera izango dute.
Hala, animatzen direnak Villafria de San Zadornil (Burgos) herritik abiatuko dira Santa Anako landetara, eta Puron ibaiaren zintzurra zeharkatu ondoren Riberatik itzuliko dira Villafriara. Orotara, 9,5 kilometro dira; 10:00etan hasiko da eta 14:00etan amaitu. Izena emateko Valderejoko parketxeko telefonora deitu behar da (945-35 31 46).
Geoloeguna programa hainbat elkarteren koordinazio lanaren emaitza da: Espainiako Geologia Elkartea, Espainiako Geologia eta Meatzaritza Institutua eta Lurreko Zientzien Irakaskuntzarako Espainiako Elkartea. Euskal Herriko kasuan, Geoloegunaren barruan antolaturiko ekintzak Euskal Herriko Unibertsitateak eta SciGea-k antolatu ohi dituzte. Kasu hontan Arabako Diputazioak eta Gaztela Leongo Juntak parte hartu dute txangoaren antolakuntzan.
Geologia zein geologoen ogibidea gizartera hurbiltzea da ekimenaren helburua. "Bizi garen inguruneko zenbait aspektu ezagutzera emateko modu bat da Geoloeguna, prozesu geologikoen funtzionamendua ulertzeko eta, era berean, ondare geologikoa babesteko garrantziaren inguruan gizartea ohartarazteko", azaldu dute.