Goizeko bederatzietan abiatuko da mendi bizikleta proba Langraiz Okatik. Herritik atera eta Oteros (1022m.) mendira igoko dira. Maratoiaren jaitsiera arriskutsuenari aurre egin beharko diote ondoren, Azkarateko Mendatean behera. Gero, Pikatxo (851 m.), Undaganako Gaina (854 m), eta Armikelora (871 m) igo beharko dira. Berrogei kilometrotik gora egin ostean Oto Goien herrira iritsiko dira kirolariak, eta Mendozako bidexkatik abiatuta Santa Katalina lorategi botanikora sartuko dira. Langraiz Okan amaituko da proba.
Gasteizko Vibike Txirrindularien Kluba eta Pro Evasion Bike taldea aritu dira iazko irailetik maratoia prestatzen. Badaiako mendilerroa aukeratu dute mendiko bizikletan ibiltzeko gustuko duten zonaldea delako. "Lehenbiziko aldia da proba bat antolatzen dugula, baina mendiko bizikletaren zale amorratuak gara, eta gustatzen zaigun ibilbidea diseinatu dugu. Esperientzia handia dugu eta badakigu zer egin behar den eta zer ez" esan du Javi Fernandez Pro Evasion Bike taldekoak. Hasieratik Iruña Okako udalaren laguntza eta babesa izan dutela nabarmendu du.
Izena emateko epea urtarrilean ireki zuten eta bi egunetan 300 lagunek eman zuten izena. "Probak arrakasta handia izan du, eta dena ondo ateratzen bada hurrengo urtean errepikatuko dugu. Hori da asmoa" esan du Fernandezek. Txirrindulari gehienak Euskal Herrikoak dira, eta horien artean hamahiru emakume daude. "Ez da ohikoa proba hauetan horrenbeste emakume egotea, normalean bi edo hiru sartzen dira bakarrik".
Probaren ezaugarri nagusia zeharkatzen diren zidorren kopuru handia da, antolatzaileen esanetan, baita Santa Katalina lorategi botanikoan sartzen dela ere.