ELA sindikatuak ohar bidez jakinarazi du hilaren 20tik aurrera greba mugagabea hasiko dela Aiarako Kuadrillako hiri hondakinen bilketa zerbitzuan, Laudio, Amurrio, Artziniega, Okondo eta Aiara udalerriak biltzen dituena. Prezero enpresa esleipendunak hitzarmenaren negoziazioan egindako azken proposamena guztiz eskasa dela esan du sindikatuak.
Aiarako Kuadrillak azpikontratatutako hamaika langile finkok greba deialdiaren alde egin dutela iragarri du ELAk, enpresak soldaten igoera KPIarekin lotzeari uko egin ostean. "Prezeroren azken proposamenak %2ko soldata igoera baino ez du aurreikusten 2026rako eta 2027rako, langileen erosahalmenaren galera betikotzen duena", esan du ELAk eta salatu du eskaintza hori "onartezina" dela egungo testuinguru ekonomikoan.
Era berean, sindikatuak ohartarazi du mobilizazioei eutsiko dietela Prezerok eta Aiarako Kuadrillak euren jarrera aldatu eta langileen eskaerei erantzuten dien proposamen bat aurkeztu arte.