Laudio, Aiara eta Artziniegako udalak estrategia bateratu bat lantzen ari dira kalean bizi diren pertsonei arreta emateko, Aiaraldean "gero eta ageriagoa eta larriagoa den errealitate sozial bati modu koordinatuan erantzuteko" helburuarekin.
Udalek azaldu dutenez, Aiaraldeara iristen diren pertsona migratzaile gehienek zaurgarritasun egoeran egiten dute, eta Araban eskuragarri dauden baliabide gehienak Gasteizen kontzentratuta daude. Laudio, Aiara eta Artziniegako udalek esan dutenez, hainbat ekimen jarri dituzte martxan, baina gaur egun ez dira nahikoak "egoeraren larritasunari erantzun egokia emateko".
Laudio, Aiara eta Artziniegako udalek errolda soziala ezartzeko beharrezkoak diren baliabide ekonomiko eta teknikoak eskatu dituzte, tresna hori funtsezkotzat jotzen baitute pertsona guztiek oinarrizko eskubide eta zerbitzuetara sarbidea izan dezaten.
Migrazio teknikaria
Halaber, Gizarte Politiketako foru diputatuari, Gorka Urtarani, Aiaraldeko Kuadrilla osoari zerbitzua emango dion migrazio arloko teknikari baten esleipena eskatu diote. Figura horren bidez lortu nahi da lurraldeko errealitatearen jarraipen zuzena egitea, udalerrien arteko koordinazioa indartzea eta kale egoeran edo bazterketa arriskuan dauden pertsonei laguntza eraginkorra bermatzea.
Era berean, udalerri txikienetan kale hezitzaileen figura ezartzearen aldeko apustua egin dute, bai eta pertsona horien autonomia pertsonala eta gizarteratzea sustatuko dituzten prestakuntza eta laneratzeko programak abian jartzearen aldekoa ere.