Azken lau urteetan Gasteizen egin eta gero, Amurrion ospatuko da 2026ko Araba Euskaraz jaia. Taupadak berpiztu! lelo, Aresketa ikastolaren aldeko ospakizuna izango da hurrengo urtekoa, ekainaren 14an.
Aurreko lau edizioetan Arabako zortzi ikastolek elkarrekin antolatu dute Arabako ikastolen aldeko jaia, eta Gasteizen ospatu dituzte lau ekitaldiak. Hurrengo urtean, Amurrion ospatuko dute, eta Aresketa ikastolak hartuko du antolaketaren pisu handiena. "Aresketa ikastolako komunitateak nahikoa indar eta gogo ditu Araba Euskaraz antolatzeko, eta Amurrion ospatu nahi dugu Araba Euskaraz", azaldu dute antolatzaileek.
Gainera, Araba Euskaraz urte osora eramango dute aurten ere, eta Amurriora bezala, Aiaraldera eta Gasteizera ere helduko da. Urtean zehar hainbat ekimen antolatu dituzte, azarotik hasita. Hala, azaroaren 9an aurkezpen jaia egingo dute, Amurrion, eta beste hainbat ekitaldi izango dira hurrengo asteetan: Gazte Talent lehiaketaren finala, Goazen kontzertua, pilota topaketak eta kantaren aurkezpena, besteak beste.