Txakolinaren 2024ko mahats bilketaren dastatzeaz gozatu ahal izango da hilaren 25ean Amurrion, bertan egingo baitute Txakolin Egunaren hogeita seigarren edizioa.
Juan Urrutia parkean hainbat upategik ekoitzitako "txakolin onenak" bilduko direla aurreratu du gaur Amurrioko Udalak, jai eguna aurkezteko bidalitako prentsa oharrean.
Udaletxean egingo dute aurtengo uztaren aurkezpena, 11:30ean, eta eguerdian txupinazoa botako dute, jaiari berari hasiera emateko. Arabako Txakolina elkarteak antolatu du eguna, eta Luken Alaba Guerrerok ondu du aurtengo kartela.
Txakolinarekin batera, pintxoak eta bestelako anoak izango dituzte. Horiek hartzeko tiketak beharko dira. Azokarekin batera, musika ere izango dute lagun: Belgorri taldeak kontzertua emango du eguerdian, eta arratsalde parteko erromeria Akerbeltz taldearen esku egongo da.