Astelehen honetako 13:15ak aldera, Ertzaintzari jakinarazi diote liskar bat izan dela Amurrioko etxebizitza batean. Abisuaren arabera, pertsona bat larri zaurituta zegoen arma zuriz egindako eraso baten ondorioz. Udaltzaingoaren eta Ertzaintzaren hainbat patruila bertaratu direnean, baieztatu ahal izan dute gizonezko batek aizto batekin eragindako ebakiak zituela gorputzeko hainbat puntutan.
Berehala, biktimari laguntzeko osasun baliabideak eskatu dituzte, eta, azkenean, larri eraman behar izan dute ospitalera. Bertan zaurituaren semea zegoen, eta atxilotu egin dute erasoaren ustezko egile gisa.
Ertzaintzak ikerketa abiarazi du erasoaren nondik norakoak argitzeko asmoz. Oraingoz, Segurtasun Sailak baieztatu duenez, etxeko indarkeria da hipotesi nagusia.