Laudio, Amurrio, Orozko eta Aiara Ukituko lituzketen bi parke eoliko egiteko Ferosca Wind Sl enpresak egin duen eskaera ofiziala argitaratu da astelehenean Arabako Lurralde Historikoaren Aldizkari Ofizialean.
Egitasmoak 2.000 hektarea inguruko azalera hartuko luke, bi parkeren bitartez: Ferosca I eta Ferosca II izenekoak. Seina aerosorgailu izango lituzke parke bakoitzak, eta 27 MW-eko potentzia gordina.
Iragarkiak zehazten du hemendik aurrera hogei eguneko epea ematen dela "parke eoliko hori ezarri eta ustiatzeko interesa duten pertsona fisiko edo juridikoek" lehia eskabidea aurkeztu dezaten.
Aiaraldea.eus-ek jaso duenez, Aiaraldeko Mendiak Bizirik plataformak salatu du Arabako Foru Aldundiak "gutxieneko gardentasun eta parte hartzerik gabe" aurrera eraman nahi dituela proiektu horiek, hauteskundeen ondoren orain udalen osaketa egiteko unea dela baliatuz. Izan ere, udalek hogei egun horiek baino ez dituzte izango helegiteak aurkezteko. Ekologisten aburuz, ez da kasualitatea baimen eskaera horiek hauteskundeen biharamunean argitaratu izana.