Atzo abiatutako greba mugagabearekin, Talleres Abasoloko langileek "aurpegia eman dezatela" exijitu diete administrazio kontseiluan enpresari buruzko erabakiak hartzeko ahalmena duten bazkideei. "Ezin dute langileen gain ezarri egin beharreko ahalegin guztia; proiektuarekin jarraitzeko helburua izatekotan, dirua jar dezatela" eskatu dute grebalariek.
Izan ere, LAB sindikatuak azaldu duenez, plantilla "oso egoera zailean" dago, urte luzeko soldata atzerapenen ondoren lau hilabeteko nomina-zorra metatu baitute. Gainera, administrazio kontseiluak ez die inolako erantzunik eman.
"Langileek oso argi dute ez dutela egun bat bera ere jarraituko doan lan egiten eta zor dietena handiagotzen", ohartarazi du LABek, enpresaren bideragarritasunari buruzko erabakia "ahalik eta azkarren" hartzea eta zorrari irtenbide bat ematea exijituz.