Aiaraldea.eus hedabideak argitaratu duenez, astearte honetako 11:47an Renfeko aldiriko zerbitzuko tren batek pertsona bat harrapatu du Gardean (Laudio), Santa Kurutzeko geltokitik gertu, eta hil egin du.
EITB taldeak beranduago jakinarazi duenez, hildakoa 85 urteko emakume bat izan da. Lehen informazioen arabera, Urduñarako tren bat hartzeko asmoz trenbidea gurutzatzen saiatu denean harrapatu du trenak. Bere aldetik, Renfek ziurtatu du trenen alarma sistemak ez duela hutsik egin. Bitartean, Ertzaintzaren ikerketak zabalik jarraitzen du, ezbeharraren nondik norakoak argitzeko.
Harrapaketaren ondorioz, tren kopurua murriztu egin dute, eta Laudio eta Urduña arteko tren zerbitzua etenda dago une honetan.