Hiri inguruetara hurbiltzen diren animaliek beroaldiari hobeto aurre egin diezaioten laguntza keinu txiki bat egitea gomendatu du Muskerrak ingurumen taldeak: etxebizitzan lorategi, terraza edo balkoi izatekotan, urez betatako ontzi txiki bat jartzea, animaliak hidratatu daitezen.
"Nahiz eta guk berotik ihes egin dezakegun etxean sartuta eta edari freskagarriak edanda, animalia basatiek ez dute aukera hori, eta espezie askok tenperatura altuen ondorioak jasaten dituzte", ohartarazi dute ohar batean.
Horregatik, animaliei laguntzeko eskatu dute. Gomendatutakoa "oso sinplea" den arren, animaliak arriskuan ez jartzeko hainbat pauso egin behar direla diote. Ontziak lau zentimetro inguruko sakonera izatea da hoberena, eta sakonagoa izatekotan, animalia txikiei aterabidea erraztuko dien harri edo arrapala txiki bat jartzeko eskatu dute. Burdinazko kazolak "ezin hobeak dira" horretarako, Aiaraldeko ingurumen taldearen esanetan.
Lorategi batean jarriz gero, bat baino gehiago jartzea gomendatu dute: bat lurrean; kasurako, sugandila edo trikuentzat; beste bat, gorago, hegaztientzat. Kasu guztietan, noizean behin garbitzea eta itzalpean jartzea gomendatu dute.
Inguruetan katuren bat izatekotan, noski, haren irismenetik kanpo uzteko eskatu dute, laguntza keinu izan behar zena katuentzako ehiza bilaka ez dadin.
Gogora ekarri dute halako egoera batean uretara sarbidea erraztu bai, baina jatekorik inoiz ez ematea dela hoberena.