Ezbeharra 15:30ak aldera jazo da igande honetan. Ikertzen ari diren arrazoiengatik, hiru bidaiari zituen ibilgailu bat A-624 errepidetik atera da Aiara udalerriaren parean, Artziniegako noranzkoan.
Ertzaintza, suhiltzaileak eta Osakidetzako osasun langileak bertaratu dira. Autoaren gidariak ez zuen pultsurik, eta larrialdi taldeak suspertzen saiatu diren arren, handik gutxira hil egin dela egiaztatu dute. Gidariarekin batera 74 eta 79 urteko bi emakume zihoazen autoan, eta Galdakao eta Gurutzetako ospitaleetara eraman behar izan dituzte, zaurituta.
Ertzaintzak eginbideak ireki ditu istripuaren nondik norakoak argitzeko.