Hildako bat eta lau zauritu izan dira Luiaondoko istripuan

Suhiltzaileek ibilgailuetan harrapatutako lagunak atera dituzte. / Argazkia: @BomberosAraba

14:10 inguruan izan da ezbeharra, Luiaondon, Amurriorako noranzkoan, Bizkaibuseko autobus batek, kamioi batek eta furgoneta batek talka egin dutenean. Furgonetako gidaria hil egin da, eta gutxienez lau lagun zauritu dira.

Segurtasun Sailak baieztatu du lagun bat hil eta lau zauritu direla gaur eguerdian, 14:10ak aldera, Laudio eta Luiaondo artean izan den istripu larrian. A-625 errepidean jazo da —Arabako errepide sareko puntu beltzetako bat—, Amurriorako noranzkoan, autobus baten, kamioi baten eta furgoneta baten arteko talkaren ondorioz. Ertzaintzaz gain, anbulantzia bat eta Osakidetzako helikopteroa bertaratu dira zauritutako bidaiariak artatzeko, eta suhiltzaileek ibilgailuetan harrapatuta gelditu diren pertsonak askatu dituzte.

Osasun langileek egiaztatu ahal izan dutenez, furgonetako gidariak lesio oso larriak izan ditu, eta suspertzeko saiakerak alferrikakoak izan dira; azkenean, mediku batek baieztatu du haren heriotza. Kamioiaren gidaria eta autobusaren gidaria ere zauritu egin dira, eta Gurutzetako eta Galdakaoko ospitaleetara eraman behar izan dituzte, hurrenez hurren, baita autobuseko bi bidaiari ere.

Argazkia: AIARALDEA.eus

Momentuz, bi erreiak moztu dituzte ibilgailuak erretiratu bitartean. Zirkulazioa AP-68 autobidera, N-634 errepidera eta Garderako irteerara bideratzen ari dira.

Ertzaintzak dagokion ikerketa jarri du abian, istripuaren nondik norakoak argitzeko. Antza denez, furgoneta Amurrioko noranzkoan zihoan, eta Bilbora zihoan autobusarekin talka egin du; ondorioz, Bizkaibuseko gidariak ezin izan du ibilgailua kontrolatu, eta kamioi baten aurka talka egin du.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide