Apirilaren 29an izan zen Dantzaren Nazioarteko Eguna, baina Amurriok maiatzaren 7an ospatuko du, Herriko Dantza Eskolaren eta Aiara Dantza Taldearen partaidetzarekin. Emanaldia eguerdiko hamabietan izango da, Juan Urrutia plazan.
Herriko Dantza Eskolako ikasleak izango dira erakustaldiaren protagonistak, eskolako ariketak eta lau koreografia taularatuz. Eskolak ibilbide luzea du Amurrion, eta ikasleek dantzaren teknikak ezagutzeko eta eskuratzeko lehen pausoak ematen dituzte bertan, euren sormen gaitasunak ahalik eta gehien sustatuz.
Emanaldi nagusiaren ostean, Aiara Dantza Taldeak ospakizunari amaiera emango dio, errepertorio zabal eta anitzarekin, ikusleei zenbait dantza propio erakutsiz.