Joan den astean zehar atontze lanak egin ostean, Laudioko Gaztetxeak bere ateak berriz ireki zituen larunbatean. Auzolanekin jarraitzeaz gain, asteburu osoko egitaraua eskaini zuten. "Laudioko gazteok espazio politikoak behar ditugu eskubide politikoen defentsan antolakuntza indartzeko", adierazi zuten gaztetxeko kideek sare sozialen bidez.
Haatik, aste berriarekin batera, Laudioko alkate Ander Añibarrok (EAJ) jakinarazi du Udalak bide judizialera jo duela, Gaztetxea desalojatzeko eta eraisteko agindu judiziala lortzeko asmoz. Azken egunetan, gainera, Udaltzaingoa behin baino gehiagotan bertaratu da Gaztetxera, hainbat gazte identifikatuz.
Kultur Etxeko obrak direla eta, Laudioko Udalak 2020ko urtarrilean eman zuen Laudioko Gaztetxea husteko agindua. Duela urtebete, gazte asanbladako kideek gaztetxea berriz ireki zuten, itxita mantentzeko erabakia "erabat arbitrarioa" zela salatuz; baina handik gutxira udaltzainek desalojatu egin zuten. Hortaz, bi urte itxita izan da Lamuza parkeko espazioa.
Kultur Etxeko lanak 2023an amaitzea dago aurreikusita, baina gaztetxeko kideek ohartarazi dute Udalak ez duela bermatu obrak amaitzean lokala berreskuratu ahal izango dutenik; Udalak, ordea, ziurtatu du gaztetxea gazte asanbladari itzuliko zaiola lanak amaitzen direnean, baita obrak irauten duten bitartean behar dutena gordetzeko espazio bat dutela ere.
Gaztetxea hiltegi zaharrean
AIARALDEA hedabideak argitaratu duenez, Gaztetxea hiltegian kokatzea proposatu du Laudioko Udalak. Gazte asanbladarekin asteazken goizean egindako bileran, Gaztetxea egungo kokalekura itzuliko ez dela jakinarazi die tokiko erakundeak gazteei. "Guk, gure aldetik, egungo espazioan geratuko garela esan diegu, baina prest agertu gara negoziatzen jarraitzeko", azaldu dute gazte asanbladako kideek.
Astean zehar atontze-lanak burutu ostean, gaur Gaztetxeak ateak berriz ireki ditu. Laudioko gazteok espazio politikoak behar ditugu eskubide politikoen defentsan antolakuntza indartzeko.
— Laudioko Gaztetxea (@LaudioGaztetxea) February 19, 2022
Hau da hurrengo egunetako egitaraua:#antolakuntzariateakireki pic.twitter.com/ps8SAYluhB
???? Gaztetxeak 2 urte daramatza itxita eta obra prozesua etengabe luzatzen ari da.
— Laudioko Gaztetxea (@LaudioGaztetxea) February 21, 2022
???? Gaztetxearen itxiera agintzen duen txostenean hau ixteko argudiorik ezin daiteke topatu.
???? Beraz, Laudioko gazteoi politika egiteko espazio bat ukatzen zaigu.
Gaztetxea gazte langileontzat! pic.twitter.com/WjaAAz841n
Baina gure eskubide politikoen defentsa gauzatzeko antolakuntzarako espazioak ezinbestekoak dira. Hau aldarrikatzeko Gaztetxea irekita mantenduko dugu.
— Laudioko Gaztetxea (@LaudioGaztetxea) February 21, 2022
Parkeko obrak gu hortik kanporatzeko aitzakia baino ez dira eta Udalaren borondate bakarra gu hortik kanpo mantentzea da. pic.twitter.com/7qCs0mp2Kq