Hizkuntza eskakizunaren inguruko epaia salatzeko mobilizazioa egingo dute Laudion

Erredakzioa 2022ko ots. 3a, 11:00
Euskaraz bizitzeko eskubidearen aldeko elkarretaratze bat. / KONTSEILUA

Euskararen Kontseiluak eta Aiaraldeko Euskalgintzaren Kontseiluak elkarretaratzera deitu dute Laudion larunbaterako, hizkuntza eskakizunen inguruko eta Udalaren erabakiaren aurkako epaia salatzeko.

Aste honetan ALEAk argitara atera duenez, Gasteizko epaile batek euskara "zaila" dela argudiatu du hizkuntza eskakizun bat saihesteko. Argudio horren bitartez, eta 45 urte gorako bitarteko funtzionarioei euskara eskatzea "diskriminatzailea" dela esanez, hizkuntza eskakizuna ez betetzeagatik lanpostua galdu zuen bitarteko funtzionarioari arrazoia eman dio epaileak.

Langileak 1.295 ordu eman zituen euskara ikasten, baina soilik 1. hizkuntz eskakizuna aurkeztu zuen, eta ikasteko "ahalegin horrekiko batere sentsibilitaterik" agertu ez izana leporatu dio epaileak Udalari. Hortaz, langilea berriro lanpostuan hartu eta indemnizazioa ordaintzeko agindu du.

Oihartzun handiko epaiak polemika eta haserrea piztu ditu Euskal Herri osoan, bereziki euskalgintzako eragileen artean. Ander Añibarro alkateak ofizialki iragarri du Laudioko Udalak epaiaren aurkako helegitea aurkeztuko duela.

Testuinguru horretan, epaiaren aurrean beren desadostasuna agertu dute Kontseiluak eta Aiaraldeko Euskalgintzak, eta elkarretaratze bateratua deitu dute larunbaterako, otsailaren 5erako, 12:30ean Laudioko herriko plazan, Euskaraz bizitzearen alde. Eskubide murrizketarik ez! lelopean. Eragile sozial eta politiko guztiei parte hartzera dei egin diete, Laudioko Udalaren erabakiaren kontrako epaia salatzeko.

"Euskal hiztunen eskubideen aurkako botere judizialaren oldarraldiari batasunezko erantzuna" ematera deitu dute.

 

"Aurrekari oso arriskutsua"

Kike Amonarriz soziolinguistak, AIARALDEA hedabidearekin izandako solasaldi batean, "aurrekari oso arriskutsutzat" jo zuen Laudioko Udalak jasotako aurkako epaia, eta horrelako kasu gehiago etorriko direla iragarri zuen:

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide