Joan den asteburuan ezezagunek Zubiko Kurajo kaletik Latiorrora doan pasabideko hainbat elementuren kontra jo zuten. Zehazki, lurpeko pasabidearen sabaian dauden argiak apurtu zituzten, eta lanpara fluoreszente bat ere eraman zuten.
Ohar batean, Laudioko Udalak jazotakoa salatu du, eta "ekintza bandalikotzat" jo du. Udalak gogora ekarri du ez dela lehen aldia horrelakorik gertatzen dena. Azaroaren amaieran, Zumalakarregi kaleko igogailu panoramikoaren aurkako ekintza bandalikoak ere egin zirela gogora ekarri du. Orduan, besteak beste, ateetan eta barruko eta kanpoko beiratean kalteak eragin zituzten. Igogailu horretan eragindako kalteak "beharbada" 2022. urtearen hasierara arte konpontzeko modurik ez dela egongo aurreratu dute, "hornidura elektronikoekin gaur egun dauden arazoak direla eta".