Aurten, Amurrioko Artzain Egunean ez dira ohiko jarduera gastronomikoak egingo, dastatzeak eta gazta lehiaketa, besteak beste. Gainera, antolatutako ardien ile mozketa, artzain-txakur edo dantza erakustaldiak, edukiera kontrolatuta eta segurtasun-tartea gordeta egingo dira, eta bertaratzen direnek eserita egon beharko dute.
Programaren barruan, latxa arrazako ardi-aziendaren probintziarteko XXVII. lehiaketa izango da, 10:00etatik 14:30era, parkean: esne-ekoizpeneko Arabako aurpegi beltzeko eta aurpegi argiko artalderik onenen erakusketa; eskualdeko esne-kontroleko ardirik onenen erakusketa;eta sasi ardi arrazako, Euskal Herriko Babes Bereziko arraza autoktonoko, ardien erakusketa.
Bestalde, Idiazabal J.D. artzain gaztaren XIV lehiaketa, 10:00etatik 14:30era izango da, Juan Urrutia Plazan; eta etxeko produktuen salmenta eta erakusketa ere egingo dute, 10:00etatik 14:30era, San Anton Plazan. Eguneko ekitaldi nagusia 11:30ean egingo dute, Juan de Urrutia Plazan. Bertan, ongi etorria egingo zaie aurten omendutako artzainei: Ziorregiko Loli Abin Guaresti (Inoso), Jose Manuel Bilbao Elorza (Altube), Nieves Martinez de Albeniz Ubago eta Angel Mª Saez de Zuazaola Martinez de Lizarduy (Araia). Omenaldia, berriz, 13:30ean hasiko da
Gaztagintza erakusketa ere egongo da, 12:00etatik 12:30era, Juan de Urrutia Plazan; eta mozte-proba tradizionalaren eta zeelandaberritarraren erakusketa, 12:30etik 13:30era, udal parkean. Amaitzeko, artzain txakurren XXII. erakustaldia, 18:00etan, izango da, Picaza Zelaiaren aurrean, Udal Igerilekuen ondoan.