Laudioko Udalak jakinarazi duenez, herriko tren geltokia berritzeko gaueko lanak gaur hasiko dira. Lanak egiteko ordutegia 00:00etatik 05:00etara luzatuko dela aurreikusi dute, mantentze-lanetarako tartea kontuan hartuta. Lanek sor ditzaketen eragozpen eta zaratak "ahalik eta txikienak" izatea espero dute Udaletik.
Zirkulazioaren beharrak direla eta, obrak gauez egingo dira. Trenbideak moztea ez da aukera gisa aztertu, eta, horregatik, trenen zirkulaziorik ez dagoen tartean aritu behar da. Lan horien barruan, besteak beste, nasak handitu, nasa-kota berria gainditzeko arrapalak egin, eta igogailuak kendu eta berriak jarriko dituzte.
Bi milioi euroko inbertsioa egingo du Renfek Laudioko tren geltokia berritzeko. Guztira, hamar hilabeteko iraupena izango dute lanek, eta Seranco enpresa arduratuko da hauetaz.