Ohar labur batean Udalak azaldu duenez, "eguraldi ona eta udako oporrak direla eta, asko dira Laudion gaueko aisialdiaz gozatzen hasi direnak", besteak beste, Lamuzako Parkean. Hala ere, pandemia eta horren ondorio gogorrenak egunero agertzen direla ohartarazi du, "ordutegi eta leku mugarik gabe".
Hori dela eta, larunbateko 23:00etatik igandeko 6:00etara bitartean parkearen ateak ixteko erabakia hartu dute. Udalaren helburua larunbat gauetan bertan gertatzen ari diren kontzentrazio handiei galga jarri eta topaketa masiboak saihestea da.
Parkera sarrera publikoa mugatzeko neurri hori "datozen hilabeteetan" egongo da indarrean, eta pandemiaren bilakaeraren arabera egokituko da.