Laudioko Udalak iragarri du 200.000 euro inguru inbertituko dituela Areta, Lamuza eta Latiorroko ikastetxeetan, hainbat hobekuntza egiteko. Pandemiak sortutako larrialdiak zenbait hobekuntzaren gelditzea ekarri zuen, eta, orain, Udalak horiei berriro ekin nahi die.
Latiorroko ikastetxean saskibaloiko pista asfaltatuko dute, eta helduentzako zentroko jolastokia ere konponduko dute. Ortega y Gasset eraikineko argiteria ere berrituko dute. Ikastetxean duten uralitazko estalkia kenduko dute.
Areta auzoko ikastetxean, arrapalak eta kanpoko eskailerak berrituko dituzte, irisgarritasun premietara "ahalik eta gehien" egokitu aldera, Udalak prentsa ohar batean adierazitakoaren arabera. Azkenik, Lamuza ikastetxe publikoko tutoretza eraikineko leiho eta arotzeria guztiak aldatuko dituzte ere. Lan hauetan, Jaurlaritzak diruaren %60 jarriko du, eta Udalak gainerako %40a.