Teknologia berriek dokumentazio historikoa eskuratzeko ematen duten aukera baliatu nahi du Laudioko Udalak, 1945etik aurrerako San Roke jaietako egitarau guztiak digitalizatzeko. "Informazio historiko garrantzitsua eta ondare balio handiko argazkiak" bilduko dituztela azaldu du Udalak.
1935ekoa ere jasoko dute, eta guztira 76 programa digitalizatuko dira. Tarteko urteetakoak ez dituzte lortu, baina, Udalak azaldu duenez, horiek ere digitalizatuko lirateke agertuko balira.
Material guztia digitalizatuta aurkeztuko da Udalaren webgunean, hainbat formatutan: TIFF formatuan 300 ppp-tan eta koloretan, JPEG masterrean 300 ppp-tan eta koloretan, JPEG hedapenean 175 ppp-tan eta koloretan eta PDFan OCRrekin (hau da, testuarekin). Programa guztiak digitalizatzeko eta tratatzeko 1.045,44 euroko inbertsioa egin du Laudiok.