Amurrio Bidean garapen agentziak eta erakundeek Gasteizko F2P Campusaren bidez bideojokoaren euskal industria sustatzeko bultzatutako Games Academy ekimenak antolatu dute tailerra ekainaren 30ean, asteazkenean, 10:00etatik 14:00etara, Amurrioko El Reforreko instalazioetan.
Tailerraren helburua bideojokoak sortzeko eta garatzeko oinarrizko tresnen erabilera hurbiltzea da, aldez aurreko ezagutzarik gabe eta modu erraz batean. Partaideek lehen mailak, mekanikak eta menuak sortu ahal izango dituzte, oso tresna errazak erabiliz, eta hutsetik hasita joko bat egiteko aukera izango dute; horrela, lehen harreman atsegin eta erraza izango dute bideojokoen munduarekin.
Ikastaroa doakoa da, baina aldez aurretik izena eman beharko da Amurrio Bideanen: 945 89 17 21 telefono zenbakian edo formacion@amurriobidean.org helbide elektronikoan.
Hazten ari den industria
"Jakin-mina eta interesa pizteko da, etxetik ikasten eta bideojokoak egiten jarraitu ahal dezaten, erabiltzen ikasiko duten doako tresnekin. Azken batean, mundu mailan eta gure herrialdean etengabe hazten ari den sektore batean bokazioa piztea da helburua", azaldu du Games Academyk. Bideojoko horiek diseinatzeko eta garatzeko behar diren profilak "askotarikoak" direla eta, beraz, interesa duten gazteek aukera ugari dituztela azpimarratu dute.
2018an, Espainiako estatuan, bideojokoen industriak 1.530 milioi euro baino gehiago fakturatu zituen; aurreko urtean baino %12 gehiago. Gainera, dagoeneko 6.000 pertsonari baino gehiagori ematen die lana.
