Laudioko ondare kultural aberatsa herritarrengandik gertuago egongo da hemendik aurrera, zenbait lekutan bederen. Izan ere, Udalak bederatzi panel informatibo ezarri ditu, toki bakoitza testuinguruan kokatzeko.
Argazkiez eta testuez osatuta, ondare puntu bakoitzaren interpretazio historikoa landu dute paneletan. Ander Añibarro alkatearen hitzetan, ekimenarekin udalerriko biztanleentzat "egokiak diren elementuak" seinalatu nahi dituzte, "batez ere arkitektonikoak, beren ondare interesagatik eta baita identitateagatik ere".
Hauek dira orain arte seinaleztatutako tokiak: Katuxako jauregi barrokoa; Ugarte dorrea; Anuntzibaiko zubia eta bere multzoa; Lamuzako Done Petri elizpea; San Joan Astobitzako baseliza; Aretako Santa Ana baseliza eta eliza; San Bartolome baseliza, Larrean; Santa Kruz baseliza, Gardean eta San Antonio santutxo-baseliza, Isusin.
7.078 euro bideratu dituzte seinaletika kanpainarako. Argazkiak, maketazioa eta panelen diseinua Kultura Ondarearen Udal Zerbitzuko teknikarien lanaren emaitza izan dira.